Um Lækjarbrekku

Lækjarbrekka er einn elsti veitingastaður landsins og er staðsettur í hjarta miðbæjar Reykjavíkur

10920916_796629763745015_2273189170960379502_n.jpg

Við sérhæfum okkur í íslenskri og skandinavískri matargerð og leggjum áherslu á ferskt Íslenskt hráefni og fyrsta flokks þjónustu.

Matseðlarnir okkar innihalda m.a. fisk og franskar, humarsúpu, fisk dagssins, lambasteik og marga fleiri gómsæta rétti.

Staðurinn opnaði árið 1981 í einu elsta húsi Reykjavíkur að Bankastræti 2 sem var byggt árið 1834 og var fyrsta og lengi vel eina bakarí bæjarins. Húsið á sér mikla sögu sem áhugasamir geta lesið nánar um hér fyrir neðan.

Í Lækjarbrekku eru staðsettir tveir veislusalir, Litla Brekka og Kornhlaðan með rými fyrir allt að 160 manns. Tilvaldir fyrir allar tegundir samkoma. Salirnir okkar eru með skjávarpa, hljóðkerfi og þráðlausu interneti.

Endilega sendið okkur línu á info@laekjarbrekka.is fyrir frekari upplýsingar.

 
12465859_987250128016310_5746361853505143881_o.jpg

Saga hússins

Veitingarekstur hófst í þessu húsi 10 okt. 1981 eftir umfangsmiklar endurbætur í framhaldi áralangrar baráttu fyrir friðun húsa hér á lóðinni. Við endurbygginguna var þess gætt meðfram sjónarmiðum um notagildi að halda sem upprunalegustu útliti. T.d. eru gluggar og burðarviðir í húsinu að stórum hluta þeir sömu og voru upphaflega.

Húsið er með þeim eldri, sem enn standa í Reykjavík, upphaflega byggt sem íbúðarhús 1834. Fyrir því stóð P.C. Knudtzon, umsvifamikill kaupskipa- og verslunareigandi í Kaupmannahöfn og Reykjavík. Hann byggði jafnframt brauðgerðarhús og móhús á lóðinni og fékk hingað til lands danskan bakara, Tönnes Daniel Bernhöft til að reka hér brauðgerð.

Bernhöft keypti svo húsin 1845 og var lengi eini bakarinn í bænum og hafði mikið umleikis. Árið 1861 byggði hann geymsluhús (Kornhlöðuna) hér syðst á lóðinni og sölubúð við íbúðarhúsið 1885 (þar sem nú er veitingasalur næst götunni). Að honum látum hélt fjölskyldan áfram rekstri brauðgerða í tvo ættliði eða fram til 1944 í gamla bakaríinu.

Merkilegt má teljast að þetta hús skuli enn standa, því tvisvar var það selt til niðurrifs. Árið 1923 keypti KFUM og K húsið í því skyni að reisa hér stórhýsi og síðar íslenska ríkið árið 1931 til að byggja hér stjórnarráðshús, en framkvæmdir drógust og ekkert varð úr þessu áformum. Húsið var notað til íbúðar fram til 1961 og áfram rekin í því lítil verslun fram að endurreisn þess. Má því segja að húsið hafi verið í niðurníðslu um áratuga skeið meðan óvissa ríkti um framtíð þess þar til það var friðað ásamt öðrum húsum í sömu húsaröð árið 1979.